Phili 3 | PONPDN | STEP | A PIL eu ri ai kan, komail en perenki Kaun o! I kin intin won komail son ta ieu ansau karos, ari so, i me i sota insensuedeki, pwe a kin kakelaile kin komail.

Philippians 3

1 A PIL eu ri ai kan, komail en perenki Kaun o! I kin intin won komail son ta ieu ansau karos, ari so, i me i sota insensuedeki, pwe a kin kakelaile kin komail. 2 Kalaka kidi kan! Kalaka toun dodok sued akan! Kalaka son en sirkomsais sued! 3 Pwe kitail, me kaudok on Kot ki nen o suaiki Kristus Iesus, o so kaporoporeki uduk, me sirkomsais. 4 Ari so, men suaiki uduk pil, mi re i. O ma amen kin lamelame, me a kak suaiki uduk, a nai kak laud san. 5 Pwe nai sirkomsaiselar ni auel en ran, nai kisan men Israel o kainok en Peniamin, o men Ipru amen me tapi san men Ipru, a nin tiak en kapun Parisar amen. 6 A nai nantion mepukat lao lel on kaloke momodisou kan, o ni ai kapwaiada tiak en kapun, nai me pun melel. 7 A me pai on ia, i mamaleki pweki Kristus. 8 lei melel, i mamaleki meakaros pwe meid kasampwal on dedoki Kristus Iesus ai Kaun, i me i muei san karos o wia pwel kilar, pwe i en anekila Kristus. 9 O i en kadiarokada re a, me sota pein ai pun, me pwili san kapun, a me pwili san poson Kristus, iei pun, me Kot kotin wadok on poson. 10 Pwe i en dedeki i o manaman en a iasadar, o ai warok ki on kalokolok pwe i en duela a matala. 11 Pwe i en konodi maureda san ren me melar akan. 12 Kaidin likamata i konodier de nai unsokelar; a i kin dadaurata, pwe i en konodi murin Kristus Iesus kotin kono ia dier. 13 Ri ai kan i sota lamelame, me i konodier, 14 A iet eu, me i kin wiada: I likidmaliela men likin sakeri ap inon ion meakan, me mi moa, o i kilekilan ap tan won kilel o, me mi moa, iei katin, me Kot kotin kileledi on ia ren Kristus Iesus. 15 Ari karos me unsokelar, en lamelame due met. A ma komail wuki san meakot ni lamalam, Kot pan kotin kadiarok on komail. 16 A me kitail konotier, kitail en inenki wei eta ni lip ota. 17 Ri ai kan idauen ia do, o ale san me kin kekeid wei duen me komail kilaner re at. 18 Pwe pan pak toto i indan komail er duen me toto, me kin kekeid wei, a met i indan komail ki sanesan, me irail imwintiti pan lopu en Kristus, 19 Me pan lokidokila ni imwi ’rail, me wia aniki kaped arail, me ar wau pan soredi, me kin paieki dipisou en sappa. 20 A deu atail mi nanlan, wasa me se kin auiaui Kaun Iesus Kristus atail Saunkamaur pan pwarado san ia. 21 Me pan kotin kalinanada war atail pwel, pwen ras on war a linan ki manaman, me a pan kotin kaloe kidi meakan karos.